13/2/2014=最後一堂physio

今日(4/2) 係第7堂 (19/12/2013, 2/1, 7/1, 16/1, 21/1, 28/1, 4/2, 13/2)
今日pt話我行得好左,但因為X型腳,所以行路時,腳仲係向內拍.
pt話我個樣好sporty, 所以好好咁比左d advice我: "睇你個樣咁sporty,你做運動只係游下水同踩單車算啦，跑跑跳跳就唔好啦，凡負重既運動都，要跑要跳都唔好啦。"
其實,我除左追巴士係唔會跑!
好驚從此以外,冇得追巴士,所以我問pt: "咁追巴士呢?"
pt雖然帶左口罩,但都係笑到噴: "呢d one off就得。人地打羽毛球打足2場，你就志在參與好啦。"
因為聽人講過,膝頭哥有事係唔好游蛙式,所以向pt求證下: "咁游唔游得蛙式?"
pt: "唔建議，因為膝頭都會有少少內旋，游自由式啦。"
今日pt教左個運動返屋企做,10下1組,做3組,但會攰,所以唔洗日日做,每日只係推patella!但我仲未推得好,推向下時,我連舊骨都未搵到!

眼淚在運動完後依然流出

車,噚日電視又話運動有用,我今日都踩左成個鐘健身單車,眼淚又一樣流!!!
我只係做左1日人咋,又跌番入去人唔似人,鬼唔鬼的狀態!!!
由人變鬼的解發事件係存錢!!!
以往既我係見到錢就會好開心,而家見到錢覺得煩,覺得忟 (雖然係咁,我都仲好應節,有利是我都會照收+非常歡迎的!!!同埋大家唔好叫我比晒D錢你地,我雖然情緒低落,但神智仍然清醒!!!)
存錢既時候,因為冇數好手上既錢有幾多就放入存錢機,部機又有D錢存唔到彈番出o黎!
存錢機出個數同我記得既又有出入,好似少左,但我因為冇數+唔記得自己存左幾錢,所以唯有按確定去存錢.
錢雖然存左,但我仲不斷諗緊究竟我存左幾多錢,存錢機會唔會出錯呢,因為我記得自己好似唔止入左咁少錢,但我又冇印象自己其實入過幾多錢,所以又覺得好煩,又好嬲自己點解唔數好晒d錢先存,結果返到屋企又喊!
估唔到存錢,會引發我既焦慮!!!!

終於似番個人

今日係初四,人地就係新年前執屋,我就今日先執左D!!!
因為終於唔洗再活o係眼淚之中,重拾番久違了的動力!!!
2013年簡直可以用人唔似人鬼唔似鬼o黎形容!
收入工穩定了,但情緒起伏到不似人形!!!
返工時,無時無刻都處於打仗,混亂既狀態,返屋企又係諗野公司野!!!
雖然今日係放假,但等陣又要仆返公司攞番d文件聽日用 (仲係放假,但又係做公司囉,妖!)
更加因為工作問題,自上年8月尾開始,平均每1-2星期就會喊最少一次!!!!
最長記錄係由星期六下午(放左工喊到星期日!),結果星期一返工,一對眼都喊腫晒!!!
但星期五又要返工,換言之,又會再次陷入做到癲的狀態!!!

回家的路上=終於可以喊啦!!!

噚晚o係自己個fb度share左好多ADHD既野,唔知朋友仔係咪睇左,今朝晨早流流就WHATSAPP我,叫我轉工!!!
覆佢o哥陣係一邊忍住眼淚一邊覆
(因為o哥時同親戚一齊唔可以喊,因為佢地唔知我有情緒問題)
結果今年既年初三就係o係強忍眼淚+在回家的路上才可喊的情緒下渡過!!!
工~~我夠想轉啦,但年紀大了,CV又花,人又唔叻,轉得去邊喎!!!
我真的老了=連走的勇氣都沒了=人生的悲哀+痛苦!!!

成人ADHD

上星期二上司食完飯同我講: "我啱啱睇完個節目,講ADHD,個主角成日轉工,做野好多甩漏,唔小心,趕唔到DEADLINE,好似你,你一定要睇!!!"

啱啱終於睇完啦,睇既時候,唔單止主角既行為似我,佢地所講既野,簡直係我既心聲!!!

睇既時候已經想喊,但都係得個想字,直至打呢篇BLOG,兩行眼淚又直流!!!!

好多衰野已經發生係我身上,我唔係又衰多一範嘛???!!!!

一諗到呢D度,眼淚係停唔到!!!

雖然我未證實係成人ADHD,但好似囉!!!

點解我既PHYSICALLY AND MENTALLY HEALTH都係咁差既???

原來唔單止身體健康冇我份,精神健康都冇我份!!!

今日係年初二,但我隻手術腳由年三十痛到今日,一行就痛,都唔知係因為真係腳痛定係對鞋令我腳痛!!!

今朝訓o係床度仲有rest pain!!!

唔單止西曆新年係跨年度咁痛,農曆新年都係一樣!!!